تخيلو معايا دابا، انك نتا ولا نتي كاتحبو شي واحد(ة)، اشنو غادي تبقا تحس تجاه هذا الشخص ؟ غادي تقول ان المشاعر لا توصف .. مم نعم عندك الصح

ولكن اشنو هو الإحساس الغريب لي كايكون فالداخل ديالك وكايخليك طاير بالفرح كلما يتجبد الإسم ديال هاد الشخص وتسمع اسمه فودنك، ولا من كاتفكرو فشي لحظة ..

من كاتكون تبغي شي شخص، كاتبغي دير المستحيل ودير كلشي باش تفرحو و تخليه فرحان، وكون قدرت تجيب ليه السماء والأرض والدنيا كاملة وتحطها قدَّامو باش يفرح .. ...

هاد شي كامل كانديروه غي على إنسان بحالو بحالك .. باش يبغيك حتى هو .. و إلا عرفت انه هو كذلك يحبك غادي تزيد تفرح وطير بالفرحة حيت كايبغيك

واشنو غادي نديرو مع حبنا لله عز وجل لي كلشي كايقول انه كايحب الله وحتى واحد من المسلمين مايقدر يقول "انا لا احب الله عز وجل" نعم كلشي كانحبوه، ولكن بيني وبينكم واش كانديرو شي حاجة لي تفرح الله عز وجل ؟ منِّي وطلع ؟ ..

فين الصلاة والكلمة الطيبة والاعمال الحسنة والخير والصدقة وعدم إيذاء الناس وبر الوالدين وووو .. أعمال بسيطة نقدرو نديروها ولكن هي كبيرة عند الله عز وجل وتقربنا منه سبحانه وكايفرح من يشوفنا انا ونتا وهذاك كانديرو هاد شي باش نقربو منه عز وجل ..

تخيلو معايا اننا نديرو هاد شي ونقربو من الله ونبغيوه قولا وفعلا، ونعرفو ان الله عز وجل حتى هو كايبغينا (رب البشر كايبغيك) ..

ممم صعيبة شوية يتخيلها بنادم ولكن غي تخيل معايا ان الله يبغينا كيفاش غادي يكون حالنا حينها وكيفاش غادي تكون فرحتنا والإحساس ديالنا ؟!؟

الله يهدينا