بـــــــلادي
1

بلادك هي بلادي
وحنا فيها جيران
بر وبحر ومياه الوادي
الشمش ولهوا متعَه ف كل مكان
وطىَ وجبال والطير الشاذي
وعيون صاينـَه ديرها ف الحسبان
نحيا ونعيش يتحقق مرادي
أمن وآمان ف تراب الوطن
يسرح ويروح فيه العادي والبادي
راحة شامله لكل فرد ذكور ونسوان

وانت يا جاري يا أحلى جار
شوف مزيان تمعن ورد البال
بحال لمدينة بحال الدوار
مَا وضوْ وتطبيب مريَح البال
لقرايَه واصلـَه لـّكبار والصغار
ومحاربة ف الأميَه للنساء والرجال

أنا وانت نهتف ونـّادي
وجميع الناس رجال نساء وشبّان
قـُرى مُدن وبوادي
واخوانا لمهاجرين الوطن
تحيا بلادنا وتعيش وحب التراب ينادي
ويسلم جمالها من عين العديان

بــــــــلادي
2

هي بـــــــــلادك
وحتى هي وهو وأنا بلادي
نحكي ونمجّد ونرد على جوابك
صورة لبـلاد يغلـّوها حفادي
اسمع يا سيدي ورد بالك
بلادنا عاليَه ف سماها
وحبها ف جميع لقلوب
الطبيعَه يا محلاها
والخير فيها مكسوب
وتادها جبال يا معلاها
والما صافي مكبوب
غابات وفدادن ف بهاها
ترابها غالي محبوب

تسارا وحوّم ف سماها
حصد وخرّف فاكيَه وحبوب
وتشافا بدوا ماها
سيدي حرازم ومولاي عقوب
وبين لبحور تم تلقاها
اسم ونسب وعنوان مكتوب
هي بلادنا دمنا فِـداها

تمتع بالنظرَه ف جمالها المكسوب
فوّج وجدّد النظرَه يا محلاها
و بالفن تنغم ايلا كنتِ موهوب
عيوط من كل جهَة شانعَه بغناها
دنيا ودين ميزان لقلوب
والقدر به نحيا ونعيش ف مجراها
بعون الله تنجى من ريح لعيوب

غاليَه وحب الرمل زاد ف غلاها
المسيرَه كانت لمّه ف رسمها ونشاها
صنعَه وإبداع وتيسير ف ملقاها
الصحراء بلادنا والمغرب هو مولاها
يحفظها ربي بقدرتـُه ف أرضها وسماها

ف شون بلادي
3

كان الزواج بالنيَه
واللي ما عندُه نيَه
ما عندُه قسميَه
هكذا ﯕالوا زمان

كان الزرع يتطحن ف الرحى
ولعجينـَه بلخميرَه البلديَه
الرّايب واللبن والمخضَه مّلحَه
كانت العافيَه بالتبن السّدرَه ومْقرقيَـه
ولوﯕيد تحت البرمَه عاطي الريحَه
ما الواد يداوي بعومَه بكريَه

كان رمضان بلا نفــار
لحريرَه وبـدّاز والشريحَه
كان السروال والبدعيَه
توبيتـَه تشامير ومنصوريَه
حرقوس الشقفـَه
لحمالـَه والشْمـار
لكرايـر مطولـَه لـﯕندايَـه
والدهنـَه بالزيت البلديـَه
اللي تعشى ما يتسحـّر
لعقل مغلفاه النيـَه

والزمان تطـوَر
ولالـَه خبزَه ما بقات تخلع
بوعو موكـَه وحتى طيـر لبـﯕـر
ما بقاش ذاك التخراف يتسمع
والشواف بالفاخر والمجمر
اللي كان ف قشاشب الناس راتع
حتى ديك العـادَه ما بقات تظهر
والزواج بالفاتحَه تـّردع
دبيحة سيدي فلان والعار دفنهم لعمر
التسليم لعقل اليوم
الخوف من سماه تـّرفع

بـــــــلادي
4

قطران بلادي وْلـَى عسل البلدان
فيها حبابي واهلي أصلي وجْدادي
فيها الغابَه والعرصَه الجْنان والفدان
ولهوا بين لجبال يوفي بمرادي

الما شلال عيون ضايات ووديان
الربيع اخضر ديمَا والطير الشادي
ما حلاك يا بلادي بر وبحر وشطآن
سدود ماها نافع لفلاحَه ف لبوادي

وشـلا منابع سايلـَه وديـان
نبدا بواد سبو على دشرنا زايد وغادي
واد ورغـَه حتى هو نديرُه ف الحسبان
واد اناون لوكس وبورﯕـراگ قاصدين الهادي

سيد الشاهد ضاية عوّه وما بوفكران
واد ملويَه ، أم الربيـع أ ُواد سـوس
واد درعَه واد لكسب أ ُواد نـﯕور
تانسيفت واد زيز نذكرهم بالفرّادي

جْنانات وعراصي وشحال من فدان
كل واد وربيعـُه منـُه لعوين وزادي
واد اميني ، أوريكـا ، أ ُواد بهت
واد دداس ، أ ُواد لاوْ ، واد تامير أ ُواد ردم
زايدين ف ماهم على لـْقدر العـادي

فلاحة بلادنا نعمَه وبزايد خيـر
خـوخ تفـاح بنـان ورمان
واحْواض النعناع ترقص على انغام الطير
تيـن وزيتون وعنب بلادي باين ويبان

فلاحتنا شادّه ف حبل التجديد والتطوير
سوقها عامر والسوم لايـق مزيان
وتراب لبلاد غالي ما ليـه تقديـر
محبتـُه زايدَه قوّه وتزيد ف قلب كل إنسان

ف بلادنــــا
5

هكـذاك ياعمي حسينـَه
مرّه مرّه
فكـّرنا ف اللي نسينـا
شحال لعبنا وشحال جرينـا
وتراب لبلاد فيه تربينا

بعينينا شفنـا ،هدرنا ودْوِينـَا
ولوّكنا اللسان
وتعلـّمنا نمشيوا كيف بغينا
ف بلادنـا وحْنـا شبـان
عبارْنـا حققنـاه بيدينـا
حطينـا الصروف ف لميزان

نهـار غـَدّه به فرحنا
وقرينا بحب نشيد الوطـن
حنا وهلنا وحبابنا
فرحنـا وعبّرنا بلسـان
ف لمدينـَه والقريَه ﯕلنـا
حياتنا فيداك يا تراب الوطن

تابع

بــــلادنــا
6

بلادنا بتراثها غنية
وجمال فنها لايـق بها
عادات وتقاليد ف شونها محضيَة
كل جهَة مولوعَه باللي فيها

لحكايَه والحجايَه والأمثال الشعبيَه
لمقوفي ولعيوط كلها ومعانيها

من مكناس نبدا ف هاذ الجولة الفنية
نسمعوا لقصيدة الملحون
واش ﯕال التولالي فيها

المصدر : الزجال المغربي بنعيسى الحاجي