قرا واهتم بقرايتك راه العلم فوق الراس تاج !!
قرا وتعلم ونفع راسك بالتكوين ولا السطاج !!
ماشي نتا تقرا فالتحضيري وكاتفكر فالزواج !!
الراس بحال السطل خاوي وعاطيها للتعواج !!
عاطيها للدوران فالزناقي والزهو والتفواج !!
وللقراية والحفاظة مسكين ماعندك مزاج !!
العلم كايعّْمر الرَّاس ونتا راسك عامر فجاج !!
قرا يا صاحبي قرايتك وتعلّم ودير الكوراج !!
راه معاك ربي ومعاك دعاوي الحاجَّة والحاج !!
وماتقولش راه رسول الله كان غي يسرح النعاج !!
ومن بعد ولاَّ تاهو تاجر وكان عندو الرواج !!
هذاك زمان وهذا زمان مشا فوج وجاو أفواج !!
والدين ديالنا دين العلم ماشي الجهل اعمي الحاج !!
راه فهاد البلاد بنادم لي ماقاريش بحال المحتاج !!
كاين لي باغي يولي مهندس وكاين لي باغي يولي سفناج !!
ولا يولَّي يبيع الديطاي وهاز الشيتة والسيراج !!
ترفد الذل هذا يعطيك درهم وهذاك عشرة وظهرك يعواج !!
يدوز عليه البرد والشتا والشمس والعجاج !!
شفتي كون قريتي كون راك وصلتي واسمك فالبلاد راج !!
ولكن نتا لي بغيتي ولي دار راسو فالنخالة ينقبو الدجاج !!
الموقع