هي عجبها فيه اللون الأسمر !!
كاتڭول ليه نتا الروح و نتا العمر !!
واش مانتزوجوش يا الفسر !!
ونديرو العقد و معايا لأروبا تسافر !!
باش تبان زوينة بدات دير الماكياج والعكر !!
ولات تلبس القصير باش معاه تخرج تسهر !!
ماكنش فبالها راه ناوي الغدر !!
هو وافق بلا مايضيع وقتو وبلا مايفكر !!
دار راسو في حبها طاح عور !!
ماشي على داك الشعر الزعر !!
ولا داك اللحم المقنطر !!
هو ڭاع ماضرب حساب للمظهر !!
كان همُّو الوحيد هو داك الپاسبور لحمر !!
بغا يبعد من هاد البلاد ويهجر !!
حيت تمحن بزاف وتقهر !!
المهم تزوجو بالزربة ومعاها قطع البحر !!
ڭلس تما واحد الشهر !!
جمع الفلوس وتعلم يهضر !!
تبدل بزاف وتغيَّر !!
طيح سروالو وصبغ داك الشعر !!
ماتقدرش تفرق بينو وبين لڭور !!
ولا يڭول ليهم سميتي أليكسندر !!
دازت الأيام عطاها بالظهر !!
تصاحب مع واحد البوڭوصة سميتها جينيفر !!
ولا تا هو يجي للبلاد راكب فميني كُوپر !!
يدير شيكي ويدفع كبير ويتعفّر !!
مشى التواضع دابا ولا متكبّر !!
دوماج ربح الپاسبور ولصحابو خسر !!
ماتقلقوش منِّي هذا هو الواقع المُّر !!
وهذه غي قصة لا أقل و لا أكثر !!
الموقع