حتا فقت وقلت صافي تقادا الكلام !!
عند راسي وخاصني نلقا المادام !!
وجا وقت جمع راس ا فلان !!
و أرى برع للشغل والخدمة والحكام !!
مكاين لا شرب لا نشاط لا دخان !!
... حتى أنا نتزوج وندير عائلة ونرجع خدام !!
ونولد الولاد ونربيهم تربية الإسلام !!
ضربتني الفيقة لقيت راسي غي كانخربق وعايش فالأوهام !!
آشمن زواج ولا دار نوض باركة من الأحلام !!
راه ماكاين لا خديجة لا إكرام !!
بنت ليوم مابغاتش ولد البلاد و راجل على قد الحال !!
هي بغات شي حد لباس عليه وعايش فمونتريال !!
و إلا كان فالمغرب خاص يكون باه عضو فالبرلمان !!
والطوموبيل والزين والفلوس فالبزطام !!
بعيد على أحمد الخضار وسعيد مول الريكلام !!
الفقير وخا ولد الناس ومحتارم فالنظر ديالها ماشي راجل وعيان !!
والغني وخا سكايري وكفايفي هو سيد الرجال والمزيان !!
حتا الزواج دخلات فيه الفلوس هذا ماتعلمنا من المسلسلات والأفلام !!
ولات البنت تاهي باغا تطلع الفوق وتبان !!
وطير من المقلة وتعاند بنت الجيران !!
كل نهار بلبسة وبغات فالعرس 20 قفطان !!
المهم درت راسي مابين رجليا وضربت على هاد البلان !!
وقلت الحمد لله على نعمة التزوفريت فقير وبيخير وعايش معيشة الألمان !!
راه الوقت تبدلات وبنادم مابقاش باغي يعيش على قد الحال !!
كاينقز للشوارما والبيتزا وهو كابر بخيزو والدنجال !!
حنا ماسلكناش حتا من فتنة الفلوس والطوموبيلات والمال !!
وكيفاش غادي ناديرو مع فتنة المسيح الدجال !!
مكنجمعش لأنه باقي بنات الناس بطبيعة الحال !!
ولكن قلت داك شي لي كانشوفو فهاد الزمان !!
الموقع
