بسألك كيف نتقابل دامنا ليل ونهار لو تقابلنا تموت الناس وتقوم القيامه
كيف واحنا بالتناقض قلب ثلج وقلب نار قلب ما عنده هيام وقلب ميت من هيامه
النصيب اللي جمعنا عاد واللي صار صار ما على قلبي ملام ولا على قلبك ملامه
لكن آآسف واقبلي مني رسالة اعتذار ظرف حب وفيه ورد وبين طياته حمامه
عله آخر ما يكون من الوله والانتظار وعل ما تبقى تحت جفني من الفرقا علامه
دام ما للحب عندك أي قيمة واعتبار ليش عذبتي خفوقي واستغليتي غرامه
ليش ما كنتي معي بالحب في نفس المسار قبل أعيش أيام موت القلب وآلآم انقسامه
جيت وعيوني هدايا شوق وأحلامي كبار ورحت انسان ما معاه من الهموم إلا عظامه
من عرفتك والأماني طايرة والنوم طار منطوي والبال يشرب وحشة الليل وظلامه
أعترف لك كنت أحبك حب حتى الانتحار كنت أحس بضعف قلبي لا سمعتك وانهزامه
لين شفت إن الفراق أحيان ما منه فرار قلت أفارقها وأموت ولا أعيش بلا كرامه
وإلا أنا والله قبلك ما عرفت الانهيار لين شفت بموق عيني نار دمعة وابتسامه
لو خذلتي حب قلبي واعتبرتيه انتصار ما خذلتي راسي اللي ما خضع للوقت هامه
بالغلا ما عاد يجمع بيننا درب ومدار كوكبين وكل كوكب له مداه وله نظامه
بعد ما قلت اتركيني واتخذت أصعب قرار مستحيل أرجع وأنا انسان ما ينزل مقامه
خذي آخر ما بقالك في شفاهي باختصار روحي بحفظ الكريم وغادري مع السلامه