صراحة الا فكرتي مزيان وجيتي تشوف، غادي تعرف انه ماخصناش نحقدو على دنيا بطما ولا هادوك لي بحالها لهاد الدرجة وفينما شفناهم نعايروهم، هادوك ختارو ديك الطريق وشافوها هي لي غادي تنفعهم وبصح نفعتهم فالدنيا وفالآخرة الله واعلم بينهم وبين خالقهم، كل واحد وكيفاش دار ليه الله عز وجل وكل واحد اشنو ختار وكل شخص حر فالإختيار ديالو، نعم غادي يجيك كلامي غريب وغادي واحد الفئة ماغاديش يعجبها ولكن قبل ماتهاجمني خليني نكمل كلامي، راه لي خاصمنا نحقدو عليه ونسخطو عليه هو هاد البلاد العوجة لي كاتعطي غي لصحاب الغنا والشطيح والرديح وهزان البوط، في حين انها كاتهمش صحاب الانجازات والاختراعات ولي دارو شي حاجة مفيدة وقدمو حاجة تشرف هاد الوطن، او على الاقل كيف كايهتمو بهادو ويتهلاو فيهم خاصهم يهتمو بهادوك، راه البلد ديالنا والمسؤولين هوما لي غنا كايكرموه، وبوسام ملكي كايقلدوه، ولي دار شي حاجة مفيدة كايهمشوه وماشي بعيد يشدوه و يكرموه حتى هو ولكن ماشي بوسام ولا جائزة إنما بالعصى واحد دار طيارة حطموه و واحد دار رادار شدوه ... + كاينة عاوتاني واحد الفئة كاتلقاهم كايهللو هنا فالفيسبوك والشعارات والتصاور والهاشتاغ غي كايتشايرو، وفنفس الوقت كاتلقاهم فالصف الاول فموازين ولا المهرجانات الاخرى، هنا كاتشوف كلشي ساخط وفالمهرجانات كانلقا بنادم بحال النمل كاتقول واش هادا هو الشعب لي كان يهضر فالفيسبوك، نفس الامر مع القناة الثانية كلشي كايهاجمها وفنفس الوقت كاتلقا تقريبا كلشي كايتفرج فيها وحافظ البرامج ديالها ولا يستطيع حذفها او الاستغناء عنها، والقناة براسها شكرات المواطنين على النسبة العالية فالمشاهدة ديالها خلال شهر رمضان ... هذا ما كان !!
بولحية مول القافية