يا دنيا شحال غدارة.
خليتي لعقول حيارى.
ناس خدمة لبلاد بجدارة.
وناس نهبة لبلاد بقدارة .
علاش فينا الحكارة ؟
الدرويش يبهدلوه, ويطيعوا مول شكارة.
يا بلادي شحال ناسك صبارة.
سيطرة علينا المظاهر الغرارة .
واهملنا اصحاب لعقول الجبارة.
تشوف ناس تحسبها واعية وهي غي شفارة.
تنهب وتسرق وتقول يا ناس على بلادكم كونوا مغيارة.
كيف الذيب يلبس لعباية ويقول كونوا غفارة.
يا بلادي شحال ناسك صبارة!
يا ناس انتما لسياد وانا ليكم خدام
انتما غطاء الراس وانا تراب تحت لقدام.
بصوتكم لي بلادكم تزيد للقدام.
ترجع جنة سيدنا ادم
كلام سمعناه كل عام
كلام عيشنا في الاوهام
شراو الاصوات بفلوس لحرام
وقالوا من رزقنا ما يضيع غرام
واصلوا وجمعوا لفلوس بالعرام
واش هذي هي فعايل الناس الاكرام؟!
تشوفوا يصرخ ويشير بالاقلام
ولا ناعس وغارق في الاحلام
ولا قاعد يتفرج في الافلام .
كيف علمنا يرفرف بين الاعلام؟!