خطة جهنمية للفوز على ثعالب الصحراء...اقترحها سي مغبون ...الجزء العاشر

برزطني الماتش ديال الجزائرقلت غادي نمشي ندردش معا سي مغبون إيمكن إيفاجي عليا شوية شافني جاي قال ليا

ـ شتك مشطون شي حاجة
امبرزطاك.. خلينا نستاراحو غير شويا ...النهار كامل وانا خدام اليوم داك
الشي لي دوزتو راحة داز عليا اليوم ...إيلا ولفتي الراحة مصيبة ...ابحالي
ماخاصهمش إيولفو الراحة....إ

ـ واغير ابقى امريح معا راسك باغي غير انشاطي امعاك شي شويا...إ

ـ على الكورة عاود ثاني ؟إ

ـ أو علاش؟ أنا كنعرف آالفلاحة أو الكورة...إ

ـ امبرزطك الماتش ديال الجزائر ياك؟إ

ـ هاذ الشي باش كتعجبني كتفهمها أو هي طايرة ...إ

ـ أو فينا هما الكوايرية ؟إ

ـ عندنا اتباركالله غير
هوما شي في لانتير شي في الأرسنال شي في الأجاكس افلت لينا غير اديال
البارصا ...مانصحابوهش غادي إيكعا أو ماتلاش إيرجع أو ما مانعطيوهش تقشيرة
مشركة نبدلوها ليه أونعطيوها لشي محلي لي كانت إيقبلو عليها امساكن ...إ

ـ أومالو غير على سبة
...لي ابغا الوطن إيبغيه بلي فيه مال التقشيرة إلا كانت امشركة شي شويا آش
غادي إيوقع ياك الدراري ديال دابا ولاو إيشركو الدجينات ويلبسوهم
..لاموض...أو كايقولو قطران ابلادي أو لا عسل ابلادات الناس ...أو لي ابغا
لبلاد فين اتربى الله إيعاونو ...حقو هذاك ..ماقال عيب ...غير مايديرش
السبة بالتقاشر ...اللعابة ديال بكري كانو إلا عيطو عليهم لسيليكسيونة
الدرب كامل إيجيب ليه لهدية كلشي فرحان ...امو اتزغرت أو اختو أو جاراتو أو
حباباتو ...أو ملي إيدخل لتيران العافية شاعلة ماعقلوش احتا على ألمانيا
ديال بيكنباور أو ارباعتو في المكسيك ديال 1970....فين باقي غادي تلقى
ابحال هاذوك اللعابة دابا ...اتصور لعاب اثقل من اللعابة كاملين ديال
المونديال من عند الله.. بلا ميسكيلاسيو بلا والو.. غير القص أو الكورة أو
اسرع منهم كاملين... باقي اتشوف ابحال هاذا ؟إ

ـ واهاذ الشي لي كتقول ليا ديال ألعاب القوى في مسابقة 100 متر ولكن كاينة الميسكيلاسيو ...إ

ـ وهاذ الشي راه كان
آسيدي أو في كرة القدم ...إالغزواني اقريب ل100كيلو أو أسرع منهم كاملين
ماركا بيت ضد بلغاريا أو سانطرا البيت ...كانت خارجة باص ..اعطاها ليه
باموس شي ثلاثين متر ديال الجري أو اخطفها من الخط صانطراها أو ماركاها
حمان ...واعرفتي على من ..؟..على مايير ..باقي شي واحد إيجري هذيك الجرية
..كون عبروها كيما كايديرو دابا إيلقاوه كايجري عشرات الثواني في 100متر
...باقي شي واحد ابحال هاذ اللعابة ...فينا هو الزهراوي أو اصحابو امالين
الكأس الإفريقية الوحيدة في 1976أو كلهم غير محليين ...الدعوا في الاحتراف...إ

ـ وادابا أنا جاي عندك اتخفف اعلياأو لا اتزيدني في الخلعة ؟إ

ـ أنا غير فكرتك في
اللعابة ديال ازمان ...ديال النفس أو الروح أو الديسيبلين ...لي قالها ليه
المدرب إيديرها خارج التيران أو في التيران ..إلا قال ليه هذاك اللعاب
مايدوزش فينما امشى تبعو ...إيلصقو ابحال الظل ديالو ...احتى إلا اخرج
إيتعالج إيتبعو...إ...أو لي اعطاوها ليهم إيقولو الله إيخلف ...الراية ديال
لبلاد هي الأولى ...إ

ـ شوقتيني ...قول ليا... كيفاش كانو عندنا ابحال هاذ اللعابة الواعرين ؟إ

ـ كانت الحياة ابسيطة مامعقداش ابحال دابا ...الدري إيديه اباه للفرقة ...أو الفرقة ابعيدة ...الطوبيس أو جيب
هاذي أو جيب هاذيك أو خلص هاذي أو خلص هاذيك أو ضور معا المدرب باش إيلعب
انهار الحد ...احتى إيطلعو لدراري الدم ..هوما أو والديهم ...أو من بعد
إيمشي الدري إيبرد لغدايد ديال الكورة في البيارات أو ابلايستايشن أو
البلية... أوكلشي ضاع ...بكري كان كلشي ساهل ...في الدار أو لا البرراكة
الكورة احدا لماعن احدا الكاميلة أو المقراش أو الكسكاس أو الرابوز ماكاينش
شي دار فيها الدراري أو ما فيهاش كورة ...لي لاباس عليهم عندهم كورة
هنكاريا أو لي ما عندهمش عندهم بيلوطا أو لا كورة ديال الميكا ...الدري كان
غير إيفيق من النعاس إيحك عينيه...إقلب على الكورة هي الأولى ...إلا عاقو
بيه والديه إيفطر... ماعاقوش بيه إيسلت معا كورتو ...ماكاين لا جيب تصويرة
ولا ورقة الخلوق ولا شهادة طبية ...كلهم اصحاح ..لا تلوث لا مرض ..من ورا
الماتشات قصعة ديال البلبولة مايبقى فيها والو ...طبسيل كبير.. كلشي مشروك
..تلقى كلشي مستعد ..ماتسمع غير ..اتسناو خوكم إيجي ..اتسناو اباكم إيجي
..ملي إيبداو الماكلة احضي صبعك الصغير لا يطيرو بيه ...الدري ملي إيخرج من
الدار بكورتو إيلقى الدراري لاعبـــــــــــــيـــــــن أو كايفرح ملي
كايلقى شي واحد كايتسنى إيدخل هو ويياه ..كل واحد من فرقة واخاإيكونو طناعش
في الفرقة واحد زايد ناقص... ويلا مالقاش إيتسنى احتى إيجي شي واحد أو
التيرانات واحد احدا لاخر ...ماكاين لا خللص لا والو... كلشي جاهز ..أو
كلشي إيلعب لي ماكايعرفش إيحبس ...ماكاين لا حكم لا والو ...الأخطاء
ماكايناش... ماتوقف الكورة احتى يمسها شي واحد بيدو ...مانو أو لا ماه...أو
الماكانات كانو قلال ماكايلعبوش اعلى الوقت كايلعبو على البيوت... ربعة أو
لا خمسة إيلا ماركاوهم بكري إيزيدو ماتش خر ...أو لغميق آرا ماعندك...
إيضربها بيدو ويقول ليك ضرباتني لصدري أو ماعندك ما تقول ليه إلا كان أكبر
منك أولا صح منك..هاداك الشي علاش كانو عندنا اللعابة امسنطحين ما يخافو
مايحشمو في التيران ولكن كلهم ديسيبليني لي قالها ليه المدرب إيديرها أو
النفس النفس النفس ...إ

ـ واهاذا راه رابوز ماشي لعاب ...إ...ههههههه

ـ خلينا من الضحك آنا راه مفقوس اكثر منك ...إ

ـ إيوا أو الحل ؟إ

ـ سير عند غيريتس آنا مالي ؟إ

ـ واجميلنا في الهضرة ...إ..اعطيني غير التشكيلة لي انقدرو نربحو بيها

ـ شوف راه كل ماتش أو
التشكيلة ديالو ماشي الموشكيل في التشكيلة خاصنا لعابة ديال النفس فينا هما
أو اللياقة واعرة مايعياوش الماتش كامل أو الضغط على لي عندو الكورة
...شتي البارصا دابا أو لا الريال ...نعطيك المثال غير بالبارصا باش تفهمني
...نقطة القوة ديالها الأولى هي القدرة على استرجاع الكرة في أقل من عشر
ثواني أو ملي أيشدوها ماتمشي ليهم على اشحال ...اللعابة ديال الخصم إيوليو
ابحالا داخلين ليها ....أو هاذ القدرة ديال استرجاع الكورة بسرعة لي عند
البارصا خاصها لياقة بدنية واعرة ماعندش اللعابة ديالنا ...أو الحل هو
انعوضوها بالنفس أو اللعب الرجولي

ـ إيوا منين غادين انجيبو هاذ اللعابة ...لا لياقة لا نفس كولشي خايف على رجليه أو باغي إيرجع بسلام لفرقتو...إ

ـ إيوا هاذا هو الموشكيل...إ

ـ إيوا آسي مغبون لفهامة ديال دابا كلها اضربات ليك فزيرو ...كون كنتي انتا هو المدرب الوطني آش تدير ؟إ

ـ عاندي واحد الحل واعر
...ولكن احتا واحد ما يبغي إيطبقو ...انتا لي صاحبي غادي تصحبني امساطي
طار ليا لفريخ أو لا كنتفلا ...خاصني انقلب على اللعابة المناسبين لهاذ
الماتش ...لعابة عندهم النفس أو الروح

ـ واشكون هوما ؟إ

ـ قلت ليك دابا كل ماتش أو اللعابة ديالو...ياك؟غادي انلعب ليهم غير الحجاج ...إ

ـ كيفاش ؟إ ...الحجاج ...غادين للعمرة؟إ

ـ واسمعني مزيان
...انسيليكسيوني غير اصحاب النفس ...واخا ماعندهمش ابحال الشماخ أو ارباعتو
..النفس تنفع في بحال هاذ الماتشات ياك الراجا خسرات فتيرانها معا آيت
ملول أو شباب المحمدية أو الوداد امعا هوارة أو افراقي اخراين ديال القسم
الثاني في كاس العرش ويلا قارنا الرجا أو الوداد معا هاذ لفراقي فرق كبير
...ولكن النفس أو الروح أو الرجولة كتربح ...غادي انسيليكسيوني غير اصحاب
اللحايا عادنا حارس دولي معروف أو دومي سانطر معروف كايماركي الكوفرات من
فوق عشرين ميترو ...أو لحايا اخراين ...أو بما أن اصحاب اللحايا فيهم احتا
هوما لمزورين لاإله إلا الله في الفم أو الزرواطة في الكم ...أو باش
مانتصيدش غادي نطلب من هاذ اللعابة ابجوج إيشوفو ليا الدوريجين لفري ماشي
التقليد باش مانتصيدش فشي واحد أورضينير... واخا ماعندوش اللحية ولكن إيكون
فري... إيتخايروهم هما لي عارفين بعضياتهم اكثر مني ...هادوك لياقة أو نفس
أو معقول ما يسهرو ما يتشيشو مايكميو مايشربو غير المعقول أو عندهم في
رجليهم... مابيهمش ...النفس تغطي على العيوب الأخرى إلا صيدو غير كوفرا
إيماركيها الدومي سانطر ديالنا...راه بطل إفريقيا مع فرقتو ماتنساش......في
الكار شادين غير التسابح لا ليزيكوتور لا اماسق انشوف شي مدرب لحية
احتاهو... عندنا جوج في البطولة كلهم مزيانين باش إيدير شانجما ...أو غادين
إيديرو التسخينات بسروال قندريسي مايلبسو تونيات احتى إينشدو النشيد
الوطني أو كلهم حافضينو... ماشي ابحال لخراين ... أو التونيات ... إيكونو
حمرين أو خضرين... احنا غادين نلعبو بالنفس أو هوما ماغادين إيشوفو لا شماخ
لا خرجة أو تقريبا كاع اللعابة بلحاياهم إيحكرونا....أو النفس ديما كتغلب
الحكرة... إيــــــــه... أو كاين لي ايحشم من الحجاج دياولنا مايقدر
إيدريبليه مايقدر إيبيضو أو لا إيماركي عليه ههههه آنضحك امعاك فهاذي...
والله أو ما قفلو لا فاورو...اللعب هذا... كاين غير المعقول لي عندو شي
حاجة إيجبدها ...اللحايا ديالنا ماساهلينش... كوايرية ...غير إيدخلو لتيران
إيجمعهم الحارس الحاج أولا الدومي سانطر الحاج وي اقراو الفاتحةويقول ليهم
إلى الأمام ...لعاب لعاب...بيت بيت... زنكة زنكة...أو اتشوف العافية شاعلة
ماكاينش ابحال النفس في الكورة ...لاربيط من جزر موريس مايسيفلي النهاية
ديال الماتش احتايسلم ويشهد لا إله إلا الله محمد رسول الله ...حينت ماعمرو
شاف شي وحدين اظريفين أو اكوايرية أو جديين ابحالهم ...احتى الاحتجاج
ماكاينش ...كلشي إيقولو ليه منك لمولانا...الجمهور إيحشم منهم... المدرب
احتاهو لحية إيدير الشانجما هيا هاذيك ...أما إلى واعدوهم بالحج أولا
العمرة إلى ربحو العافية غادية تشعل ...غير جيب رجال المطافي احدا التيران

ـ راه احتا هوما عندهم شي لحايا في السيليكسيونا ...إ

ـ ياالله واحد أو لا
جوج... احنا راه غادين بفرقة كاملة ...النفس أو المعقول أو الكورة أو
عازلين بعضياتهم ماكاينش شي واحد أورضينير... كاين آالحجاج أو لي ناوين
إيمشيو للحج ..التقوى أو الإيمان أو الرياضة أو حب  الله أوالملك أو الوطن

ـ واكتقول ليا شي حاجة غير ممكنة ...إ

ـ واإيلا ابغايتي تربح
را اللعابة ديال بكري لي كانو إيخليو رجليهم في التيران مابقاوش أو
المحترفين ماشي هوما الحل ...خاص البطولة ديالنا تكون قوية ويطعمو المنتخب
بجوج محترفين أو لا ثلاثة إيكونو واعرين مايفوتوهمش ابحال المنتخب ديال 86
...واشحال هذا ماتليتي دندنتي لينا آالغيواني ...إ

ـ واش أنا شداني الخلعة من دابا أو اندندن...إ

ـ غير صوب الوثرة لي اتقطعات ...مايكون غير الخير..